ബി.സി. നിയമസഭാംഗങ്ങൾക്ക് സാമ്പത്തിക സാക്ഷരതാ പരിശീലനം നിർബന്ധമാക്കണമെന്ന ശുപാർശയുമായി പ്രതിപക്ഷം

 

ബ്രിട്ടീഷ് കൊളംബിയ നിയമസഭയിലേക്ക് പുതുതായി തിരഞ്ഞെടുക്കപ്പെടുന്ന ജനപ്രതിനിധികൾക്ക് ഗവൺമെൻ്റ് ഇക്കണോമിക്സ്, പബ്ലിക് ഫിനാൻസ് എന്നിവയിൽ നിർബന്ധിത പരിശീലനം നൽകണമെന്ന ശുപാർശയുമായി പ്രതിപക്ഷം. ബി.സി. കൺസർവേറ്റീവ് പാർട്ടി എം.എൽ.എയും തൊഴിൽ-സാമ്പത്തിക വികസന വകുപ്പുകളുടെ ഷാഡോ മിനിസ്റ്ററുമായ ഗവിൻ ഡ്യൂ ആണ് ഇതുസംബന്ധിച്ച പ്രമേയം അവതരിപ്പിച്ചത്.

പൊതുനികുതി, സർക്കാർ ചെലവുകൾ, കടം തുടങ്ങിയ നിർണ്ണായക വിഷയങ്ങളിൽ തീരുമാനമെടുക്കുന്ന ജനപ്രതിനിധികൾക്ക് അടിസ്ഥാനപരമായ സാമ്പത്തിക അവബോധം ഉണ്ടായിരിക്കണമെന്നും, ഇത് നികുതിദായകരോടുള്ള ഭരണഘടനാപരമായ ഉത്തരവാദിത്തമാണെന്നും അദ്ദേഹം വ്യക്തമാക്കി. നിലവിൽ നൽകുന്ന പാർലമെൻ്ററി പ്രൊസീജ്യർ പരിശീലനത്തോടൊപ്പം സാമ്പത്തിക സാക്ഷരതാ കോഴ്സ് കൂടി ഉൾപ്പെടുത്താനാണ് പ്രമേയം ലക്ഷ്യമിടുന്നത്.
സംസ്ഥാനത്തെ നിലവിലെ സാമ്പത്തിക പ്രതിസന്ധിയും വർദ്ധിച്ചുവരുന്ന ബജറ്റ് കമ്മിയും ചൂണ്ടിക്കാട്ടിയാണ് ഈ നിർദ്ദേശം മുന്നോട്ടുവെച്ചിരിക്കുന്നത്.

2026/2027 സാമ്പത്തിക വർഷത്തിൽ ബ്രിട്ടീഷ് കൊളംബിയയുടെ ചരിത്രത്തിലെ ഏറ്റവും ഉയർന്ന വാർഷിക കമ്മിയായ $13.3 ബില്യൺ രേഖപ്പെടുത്തുന്ന ബജറ്റാണ് പ്രീമിയർ ഡേവിഡ് എബിയുടെ നേതൃത്വത്തിലുള്ള എൻ.ഡി.പി.  സർക്കാർ അവതരിപ്പിച്ചത്. സർക്കാർ ചെലവുകൾ നിയന്ത്രിക്കുന്നതിലും സാമ്പത്തിക വളർച്ചയെ ഉത്തേജിപ്പിക്കുന്നതിലും ഭരണകൂടം പരാജയപ്പെട്ടുവെന്ന ആരോപണം നിലനിൽക്കെ, എം.എൽ.എമാർക്ക് സാമ്പത്തിക അറിവ് പകരുന്നത് ഭരണനിർവ്വഹണത്തിൽ കൂടുതൽ വ്യക്തതയും ഉത്തരവാദിത്തവും കൊണ്ടുവരുമെന്ന് പ്രതിപക്ഷം വാദിക്കുന്നു. വരും വർഷങ്ങളിലും കമ്മി തുടരുമെന്ന സാമ്പത്തിക പ്രവചനങ്ങൾക്കിടയിൽ ഈ പരിഷ്കാരം ഏറെ ശ്രദ്ധേയമാണ്.